Admir Abrija, Drejtori i Përgjithshëm i Burgjeve, është larguar ditën e sotme nga detyra duke dorëzuar dorëheqjen, konfirmuan burime nga Ministria e Drejtësisë.
Raportohet se ai pritet të emërohet në një tjetër post shtetëror.
Një sërë problematikash dhe shkeljesh janë raportuar në burgjet e vendit nën drejtimin e Admir Abrijas.
Më e rënda u shënua dy muaj më parë në burgun e sigurisë së lartë në Peqin, ku i burgosuri Sokol Mjacaj vrau të burgosurin tjetër Arben Lleshi. Ngjarja shënoi një dështim spektakolar të sigurisë.
Media ka raportuar edhe për procedura të dyshimta tenderuese të Drejtorisë së Burgjeve, nën drejtimin e Admir Abrijas.
Admir Abrija e mbante këtë post që prej dhjetorit të vitit 2021. Abrija ishte pasues i Agim Ismailit në krye të Drejtorisë së Burgjeve, post që e mori me propozim të ministrit të Drejtësisë Ulsi Manja.
