Emisioni “Fol” u ndal sot në Gjirokastër, për t’u njohur nga afër me problemet e blegtorëve të Delvinës e Gjirokastrës. Nga viti në vit po pakësohet numri i bagëtive, ndërsa blegtorët thonë që nuk po ia dalin dot më pasi “po na shkatërron prodhimi i huaj”.
Ata vënë në dukje se prodhimet e huaja vijnë me çmime shumë më të lira, pasi në vendet e origjinës ka subvencion, ndërsa produktet kanë po ashtu përmbajtje qumështpluhuri. Ndër të tjera ata tregojnë se në Rumani dhe Bullgari rriten qengja enkas për tregun shqiptar, të vaksinuar për të shtuar peshë.
Një blegtor thotë se e ka të pamundur që me prodhimet e tij bio të konkurrojë mallrat e importit.
“Ne na dëmton më shumë prodhimi që vjen nga jashtë. Këtu vjen qumësht me 800 lekë nga Serbia, sepse ai vjen i subvencionuar. Ne nuk konkurrojmë dot në treg me ata, sepse prodhimet tona janë Bio. Ne jemi një industri pa çati, jemi një industri e rriskuar në çdo stinë të vitit, sepse edhe kushtet e motit kanë ndryshuar. Veprat ujore ku pinë ujë bagëtitë që nga koha e xhaxhit s’është vënë dorë, janë të shkatërruara. Ka ca vite që japin një subvencion, por edhe atë në një fashë të caktuar, deri në 800 krerë. I kanë bërë njerëzit me 5 nipte në familje, që t’i ndash bagëtitë. Ne 1200 lekë të reja marrim për një dele, edhe ato i zbresim. Ata që bëjnë politikat e bujqësisë s’na kanë pyetur kurrë çfarë problemi keni. Kur vjen momenti i kullotës vijnë dhe thonë hajde ta paguash. Atje shkruan që do ruash edhe veprat ujore, ato janë kthyer në gropa septike, s’janë më lera për bagëtitë. Ne paguajmë shkurret, se kullota s’quhen më ato”.
Ai thotë se 4 kompani të mëdha, që kanë lidhje politike, po konkurrojnë baxhot e vogla në treg.
“Janë nga 4 kompani që e kanë bërë lojë atë punë. Ato konkurrojnë edhe baxhot e vogla në treg. I kanë disa njerëz që kanë shtrirë krahët dhe kanë ngrenë bukë me çdo lloj qeverie. Ata e kanë monopolin. Ai që shesin ata s’është qumësht tamam. Ata bredhin në gjithë Shqipërinë me furgona dhe kosi s’u prishet si gëlqerja, i hedhin qumësht pluhur, lëndë të huaja, atë e di AKU-ja. Pas protestave ka pasur disa kontrolle ndaj punishteve, ndaj fabrikave. Por gjithmonë presioni ushtrohet te fabrikat e vogla jo të mëdha”.
I pyetur se sa duhet të jetë qumështi që blegtorët të kënaqen me punën, blegtori shprehet se:
“Qumështi duhet të shkojë me 2000 lekë të vjetra. Çdo çmim nën 2000 lekë jemi në humbje. Ne na konkurron prodhimi që vjen nga jashtë. Është firmosur ajo marrëveshja e tregtisë së lirë, Ballkani i Hapur. Vjen djath nga Maqedonia, qumësht pluhuri nga Serbia. Në Rumani dhe në Bullgari rriten qengja apostafat për t’i shitur në Shqipëri. I subvencionon shteti ata. Nëse do merrnim 35 euro për një dele, edhe unë s’do isha në kundërshtim që qumështi të ishte me 1500 lekë”.
Një tjetër blegtor thotë se qengjat që vijnë nga jashtë janë të vaksinuar për të shtuar peshë.
“Shelegët që vijnë nga jashtë janë të vaksinuar për të shtuar peshë. Nuk e konkurrojmë dot ne me natyre. Ne i kemi 100 për qind bio. Janë të rritur me misër dhe jonxhë që janë ushqim natyre. I kullosim me misër dhe jonxhë sepse kullotat i kemi të pamjaftueshme”.
