Socialistët duket janë urdhëruar të mos bëjnë komente për deklaratat e Arben Ahmetajt, i cili akuzoi kryeministrin Edi Rama si kokën e inceneratorëve dhe kryebashkiakun Erion Veliaj si pronarin faktik të inceneratorit të Tiranës.
Pjesëtarë të qeverisë kanë heshtur kur janë pyetur nga media për deklaratat e Ahmetajt. Kryetari i Bashkisë së Tiranës, Erion Veliaj bëri të njëjtën gjë këtë të hënë.
“Mirel Mërtirin e kanë zhdukur nga Shqipëria këta që të them unë për t’i marrë biznesin dhe ia kanë marrë. Mireli tek intervista me ju, ju referua për mua me të drejtë, konceptit të pronarit faktik… Po mirë, Erion Veliaj a e ka urdhëruar inceneratorin e Tiranës, landfillin e Tiranës që x, y, kompani të mos paguajë. A nuk është kjo veprim i një pronari faktik”, tha Ahmetaj në një intervistë televizive disa ditë më parë.
I pyetur për deklaratat e ish-shokut të partisë në një intervistë televizive, Veliaj tha shkurtimisht: “Nuk kam asgjë për të komentuar për deklaratat e tij”.
Kreu i Bashkisë së Tiranës tha më tej se nuk ka asnjë problem me drejtësinë dhe pretendoi se s’ka asgjë për të fshehur në lidhje me çështjen e inceneratorit të Tiranës.
