Policia e Tiranës ka zbardhur ngjarje e rëndë të regjistruar dy ditëve më parë në Kamëz, ku 27-vjeçarja Sibela Abedini u hodh nga tarraca e katit të katërt dhe për pasojë gjeti vdekjen. Autoritetet raportojnë se e reja e ndërmori aktin ekstrem, pasi një person i kishte publikuar një foto intime të saj.
Uniformat blu kanë vënë në pranga shtetasin Altin Çoku, 39 vjeç, i cili dyshohet se i ka publikuar foton. Mbi të rëndon akuza për veprën penale “Shkaktimi i vetëvrasjes”.
“Ky shtetas dyshohet se ka publikuar një foto intime të 27-vjeçares, e cila dyshohet se për këtë shkak është vetëhedhur nga tarraca e katit të 4-t dhe si pasojë e dëmtimeve të marra, ka humbur jetën.” – thuhet në njoftimin e bluve të kryeqytetit.
Materialet procedurale i kaluan Prokurorisë, për veprime të mëtejshme.
Ngjarja ndodhi rreth orës 23:00 të së shtunës, në rrugën “Teuta” në Kamëz. 27-vjeçarja Sibela Abedini u hodh nga kati i katërt i tarracës së banesës ku jetonte me qira dhe u transportua me urgjencë në spital, por nuk arriti dot t’u mbijetonte plagëve të marra.
