Renato Nasto, i arrestuar dy ditë më parë për mashtrim me vizat amerikane, deklaroi para Gjykatës së Tiranës se nuk ka kryer asnjë shkelje. Ai është shprehur se ka ofruar vetëm konsulencë dhe ka ndihmuar qytetarët me aplikimet për vizat amerikane. Nasto ka deklaruar se u ka marrë pagesën në përfundim të procedurave, por flet për shifra 100-150 euro, ndryshe nga ajo 10 mijë euro që raportoi policia në njoftimin për arrestimin e tij.
“Nuk kam kryer asnjë shkelje të ligjit, kam ndihmuar qytetarët që të bënin aplikimin për vizë, ata të cilët nuk kishin mundësi t’i bënin vetë, me vlerë 100-150 Euro. Nuk janë të vërteta pretendimet e Prokurorisë. Aktualisht punoj edhe si taksist për të rritur të ardhurat e mia”, ka thënë ai para trupës gjykuese.
Ndërsa të arrestuarit e tjerë kanë kërkuar ndjesë. Në seancë, organi i akuzës ka pretenduar se me metoda speciale, përmes stimulimit, 30-vjeçari Nasto për vizën kërkonte 10 mijë Euro. Në rast se ata nuk i kishin paratë, lidhte një kontratë me ta që pagesën ta bënin më vonë, duke pranuar që ia kishin borxh.
Gjykata e Tiranës la në fuqi masat e sigurisë të dhëna në mungesë; “arrest në burg” për Renato Naston, Klaudio Leçinin, Klaus Kapedanin dhe Xhemal Seserin, ndërsa për Klea Priftin “arrest në shtëpi”.
Mbi ta, rëndojnë akuzat për “Mashtrim”, “Falsifikim i vulave, stampave dhe formularëve” dhe “Ndihma për kalim të paligjshëm të kufijve”.
Lidhur me rastin, një person është në kërkim.
