Tirana dhe Erzeni do të përballen të dielën në ‘Air Albania’ në orën 17:00 për të luajtur ndeshjen e javës së 23-të të Superiores. Përballjet mes tyre kanë dhuruar gjithmonë surpriza teksa në ato dy të fundit, shijakasit kanë arritur të marrin 4 pikë.
Tirana kërkon hakmarrjen, por shijakasit sapo kanë zyrtarizuar Skerdi Bejzaden si trajnerin e ri dhe sigurisht synohet nisja me këmbën e mbarë. Një tjetër fakt i rëndësishëm është se tifozët shijakas janë të dënuar nga Komisioni i Disiplinës dhe sektori mik është i mbyllur.
Megjithatë, kjo nuk i pengon dashamirësit shijakas të marrin bileta në pjesët e tjera të tribunave dhe në një nga faqet e tifozëve bëhet thirrje për blerjen e biletave në sektorët E107 dhe E108. Mirëpo, në sektoret N pikërisht ngjitur me ta do të qëndrojnë ultrasit bardheblu “Tirona Fanatics” duke qenë se Sektori S (i zakonshmi për tifozërinë mike) është mbyllur prej javësh për shkak sigurie.
Mbetet të shihet nëse dy tifozëritë do të shijojnë ndeshjen krah njëri-tjetrit, por vlen të theksohet se tifozët shijakas gëzojnë një marrëdhënie të mirë me të dyja kampet e kryeqytetit.
