Shqipëria ka njohur pasditen e kësaj të enjteje kundërshtarët e grupit për edicionin 2024-2025 të Ligës së Kombeve.
Në shortin e hedhur në Paris të Francës, Kombëtarja shqiptare mësoi se do të jetë pjesë e Grupit B1 së bashku me Çekinë, Ukrainën dhe Gjeorgjinë.
Një përsëritje e përballjeve me Republikën Çeke nga vazo e parë, ku u evitua Anglia, me çekët që edhe pse u dhuruam një leksion në tetor në Air Albania mbeten një kundërshtar i vështirë, ashtu si dhe Ukraina, që përpos problematikave jashtë futbollit ka dhuruar vitet e fundit futboll tërheqës dhe me elementë të spikatur.
Ndërkohë që nga vazo e katërt ku shumëkush mund të kishte dashur një derbi me Greqinë, shorti rezervoi si kundërshtarë të Shqipërisë Gjeorgjinë, një tjetër skuadër që vjen nga shkolla e ish Bashkimit Sovjetik, dhe që ka në gjirin e saj një yll si Khvicha Kvaratskelia.
Gjithçka do të nisë më 5 shtator të këtij viti, ku Shqipëria do të zhvillojë dy sfidat e para, më pas në tetor do të luhen dy ndeshjet e tjera dhe në muajin nëntor do të mbyllet gjithçka me dy sfidat e fundit të grupit.
Kompeticioni i Ligës së Kombeve ka ngritur siparin për herë të parë në sezonin 2018-2019.
Shqipëria në dy sezonet e para ka garuar në Ligën C dhe pas suksesit të arritur në sezonin 2020-2021 duke u renditur në vendin e parë në Grupin 4 të Ligës C, ka avancuar në Ligën B. Edhe këtë sezon kuqezinjtë ndodhen në Ligën B, teksa synimi është kalimi në Ligën A.
Në këtë edicion Liga e Kombeve ka risi të veçanta, pasi edhe skuadrat e vendit të tretë nuk e kanë të sigurt mbijetesën në Ligë, pasi do të luajnë në play-out me ekipet e vendeve të dyta në ligën më poshtë.
