Policia zbardhi këtë të hënë, vendosjen e tritolit në zyrën e noteres Esmeralda Dauti, ngjarje kjo e ndodhur më 30 Janar, në rrugën ‘Perlat Rexhepi’, në Tiranë
Në pranga u vunë 3 autorët e sulmit, Rald Zefi, 33 vjeç nga Shkodra; Krado Katana, 33 vjeç nga Durrësi dhe Eno Flamuraj, 36 vjeç nga Korça. Ndërkohë u shpallën në kërkim dy shtetas të tjerë.
Këta shtetas, pas vendosën lëndën plasëse në zyrën noteriale, janë larguar me motorin e Eno Flamurajt drejt zonës së Liqenit të Farkës. Pikërisht aty autorët kanë hedhur motorin e përdorur në krim dhe më pas kanë lëvizur me një automjet tip “Audi”, të shtetasit Korrado Katana.
Tre personat e arrestuar janë shtetasit në foton e mëposhtme, të cilët dyshohet se ishin paguar për vendosjen e lëndës plasëse tek zyra noteriale.
Siç mund ta shihni dhe tek video e mëposhtme, TV Klan ka siguruar pamjet filmike të kamerave të sigurisë, të cilat ndihmuan hetuesit për identifikimin e autorëve.
Paralelisht me kapjen e tyre uniformat blu po punojnë për identifikimin e personit që porositi vendosjen e lëndës plasëse tek noterja Esmeralda Dauti, sulm ky që dyshohet të ketë ardhur për shkak të profesionit të saj.
Grupi prej 5 personash gjithashtu dyshohet të jenë edhe autorët e vendosje së tritolit në një bar kafe në zonën e Komunës së Parisit, ngjarje kjo e regjistruar në 5 Tetor të 2023.
