Anëtrai i Krysisë së PD-së dhe njëherazi një nga denoncuesit e aferës së inceneratorëve, Belind Këlliçi, ka ndërhyrë gjatë emisionit në Syri Tv për të sqaruar akuzat se dokumentat e kësaj afere i ka marrë nga ish-zëvendës kryeministri Arben Ahmetaj.
Këlliçi i ka mohuar këto akuza, ku sipas tij Arben Ahmetaj nuk ka pasur kurrë lidhje me dhënien e dokumentave ndaj tij apo grupit të punës së ekspertëve pranë PD. Sipas Këlliçit, ende nuk e ka kontaktuar ndonjë individ nga organi i akuzës për t’a pyetur se ku i kanë gjetur ato dokumenta autentike.
Këlliçi: Në mënyrë kategorike, deklaroj me përgjegjësi të plotë se, jo vetëm që Arben Ahmetaj nuk mi ka dhënë dokumentat, por edhe as në mënyrë të tërthortë as përmes personave të tretë as nëpërmjet ndonjë njohje që mund të jetë qoftë edhe e përbashkët për shkak të detyrës sime si deputet për një periudhë kohe, Arben Ahmetaj nuk ka pasur kurrë lidhje me dhënien e dokumentave ndaj meje apo grupit të punës së ekspertëve pranë PD. Se ku i kemi gjetur ne dokumenta, unë kam pritur të thirrem edhe nga SPAK, kam dorëzuar 1200 faqe dokumenta në SPAK që i kemi autentike kemi ende dokumenta të reja që do i dorëzojmë dhe ende nuk ka kontaktuar ndonjë individ nga organi i akuzës për të na pyetur se ku i kemi gjetur këto.
I them Batonit apo kujtdo që është i interesuar, që po të kishte qënë për Arben Ahmetaj nuk do të ishte bërë ajo transparencë që është bërë deri më sot, por nga ana tjetër ka ende me dhjetëra dokumenta të tjera që do ti bëjmë publike sepse kemi një material shumë voluminoz që e punojmë çdo ditë dhe në momentin që arrijmë të bëjmë lidhjet ne i bëjmë publike dhe i depozitojmë me firmë dhe vulë me shkresë zyrtare dhe në SPAK çdo dokument që kemi.
