Një shtetas armen është arrestuar nga Policia në pikën kufitare të Qafë Botës, pasi ishte shpallur në kërkim ndërkombëtar nga autoritetet ruse. Në pranga është vënë shtetasi 61-vjeçari armen, Karen Shakaryan, me vendbanim në Greqi, i cili është kapur në tentativë për të hyrë në Shqipëri.
“Gjykata e Solnechnogorsk, Moskë, Rusi, me vendimin e datës 25.05.2012, i ka caktuar këtij shtetasi, masën e sigurisë “Arrest në burg”, për kryerjen e veprës penale “Prodhim dhe shitja e lëndëve narkotike”, parashikuar nga Kodi Penal i Rusisë.” – thuhet në njoftimin e Policisë.
Autoritetet bëjnë me dije se vijojnë procedurat për ekstradimin e 61-vjeçarit në Rusi.
Materialet procedurale i kaluan Prokurorisë së Sarandës për veprime të mëtejshme.
