Deputeti i përjashtuar nga Kuvendi, zoti Luan Baçi, ka komentuar rreth vendimit për përjashtimin e deputetëve të opozitës.
Zoti Baçi u shpreh se deputetët e përjashtuar nuk kryen asnjë veprim që të cënojë mbarëvajtjen e seancës dhe se nga kryetarja e Kuvendit, zonja Lindita Nikolla, u urdhërua që garda të largohej nga salla e Kuvendit.
Sipas tij, mazhoranca nuk u ndje në asnjë moment e kërcënuar dhe se ishte tepër e qartë që deputetët e opozitës u treguan tepër të qetë.
“U vërtetua që kjo është metoda e tyre. Ata gjithmonë synojnë që të përjashtojnë deputetët nga Kuvendi”, tha Luan Baçi.
Deputeti i PD-së u shpreh se ky vendim është kryer jashtë rregullores dhe në mënyrë të paligjshme.
“Komisioni i Etikës duhet të mblidhet brenda 48 orëve nga momenti që ndodh një ngjarje. Vendimi u dha 4 ditë më vonë. Komisioni duhet të thërrasë deputetët dhe të ballafaqohet me ta. Komisioni e dha vendimin pa na thirrur dhe pa u ballafaquar me ne”, ka shtuar Baçi.
Ai tha se në Kuvend gjejnë 5-6 deputetë, të cilët Baçi i quan “dele” dhe i dërgojnë për të paraqitur një kërkesë për përjashtimin e deputetëve.
Baçi e quajti qeverisjen e kryeministrit Rama si një “qeverisje diktatoriale” dhe se aktualisht po jetojmë në një sistem autoritar.
