Natyrisht po priteshin disa rezultate surprizë, por jo kur bëhet fjalë për kryesuesit e Superiores. Egnatia, Tirana e Partizani kanë arritur të bëjnë “detyrën”, në raundin e 1/8-ve.
Kështu, në “Selman Stërmasi”, bardheblutë e Julian Ahmatajt kanë bërë detyrën ndaj dibranëve, të Korabit, duke i mundur këta të fundit, me rezultatin e pastër 3 me 0.
Fitorja mund të thuhet që u “vulos”, që në pjesën e parë të sfidës falë golave të Bruno Lulajt e Liridon Latifit, në minutat 28’ e 39’, ndërsa rezultatin e përgjithshëm e “hipotekoi” kapiteni, Erion Hoxhallari, në minutën e 47’.
Fitore të thellë pati edhe në “Areën e Demave”, me “Demat e Kuq” të Orges Shehit, që mundën me rezultatin e thellë, 3 me 1, fierakët e Apolonisë.
Për fitoren e Partizanit menduan Skuka, i cili shënon golin e tij të parë pas rikthimit, Hadroj e Mensah, të cilët gjetën rrjetën në minutat 56’, 65’ e 87’, ndërsa për miqtë fierakë golin e “nderit” e Romeo Harizaj, në minutën e 55’-të të përballjes.
Pastër fitoi edhe Egnatia, me djemtë e Edlir Tetovës, mundën Lushnjën, me rezultatin, 2-0.
Në përballje të tjera, Erzent mundi me rezultatin e ngushtë, 2 -1, Bylisin, pas golave të Amir Kahrimanovic e Redon Mihanës, në minutat 23’ e 28’, ndërsa për miqtë shënoi Kibe në të 75’-tën.
Kukësi mposhti Elbasanin, falë një goli, të Rashitit, në “frymën e fundit” të sfidës, ndërsa Laçi mposhtën me rezultatin minimal, 1-0, Dinamon falë një autogoli të të sapo afruarit në merkato, Stivian Janku.
Kështu, në raundin e radhës kalojnë skuadrat e Egnatias, Erzenit, Kukësit, Laçit, Partizanit e Tiranës, ndërsa për të plotësuar 8-shen çerek-finaliste do të duhet përfundimi i sfidave, të orës 17:00, Vllaznia-Flamurtari e Teuta-Skënderbeu, ku në rast fitoreje të “Kuqebluve” në “Loro Boriçi”, trofeu i Kupës së Shqipërisë qëndron në Kategorinë Superiore.
Rezultatet:
