Autoritetet italian që në orët e para të mëngjesit të sotëm kanë kryer një operacion antidrogë në provincat Cuneo, Torino, Asti dhe Rimini në Itali. Në kuadër të këtij operacioni u ekzekutuan 14 masa paraprake sigurie ndaj14 personave të cilët janë nën hetim për tregti dhe trafik droge, zhvatje dhe armëmbajtje pa leje.
Gjatë operacionit policor në një fermë në fshatin Alba u gjetën 510 bimë kanabis dhe 18 kg marijuanë të paketuara dhe gati për t’u shitur. Sera ishte e krijuar me kushtet e duhura për rritjen e bimëve dhe mbikëqyrej nga dy punëtorë që kujdeseshin për to. Ferma e kanabisit administrohej nga një organizatë kriminale italo-shqiptare aktive midis Langhe dhe Roero, me degë në zonën e Astit, shkruajnë mediat italiane.
Operacioni i zhvilluar në orët e para të ditës së sotme nga rreth gjashtëdhjetë policë, midis provincave Cuneo, Torino, Asti dhe Rimini, çoi në ekzekutimin e 14 masave paraprake: tetë urdhra paraburgimi në burg, plus tre arreste shtëpie, një detyrim paraqitje, një ndalim qëndrimi në provincën e Cuneos dhe një detyrim për të nënshkruar.
Në hetim janë edhe nëntë persona të tjerë, të cilët e çojnë nurmin në 23. Nga kontrolli në shtëpinë e njërit prej tyre, i cili përfundoi me arrestimin flagrant të tij, u gjetën edhe 200 gramë kokainë dhe 500 marijuanë.
Në pranga kanë përfunduar: pesë shqiptarë dhe tre italianë. Mes këtyre të fundit është edhe njeriu që ka vepruar si ndërmjetës me kanalin kryesor të furnizimit me kokainë, i ardhur nga Kalabria. Akuzat ndaj të arrestuarve përfshijnë edhe zhvatje dhe mbajtje pa leje të armëve të zjarrit. Karabienierët sekuestruan edhe një armë e cila iu përdorej për klientët me borxhe të mëdha, për t’i kërcënuar.
