Mikela Skandaj, 14-vjeçarja e cila jeton në Verona të Italisë është një yll i vërtetë në sportin e karatesë dhe këtë e konfirmojnë më së miri rezultatet e saj.
Mikela regjistron shumë medalje të rëndësishme ndërkombëtare, ku spikasin tri medalje në Kampionatin Europian për të reja, një e argjendtë e fituar vetëm pak kohë më parë në Francë, si edhe dy medalje të bronzta.
Mikela Skandaj këto rezultate i ka arritur duke përfaqësuar Italinë, por sportistja e talentuar me origjinë nga Lezha, ka theksuar gjithnjë, se ëndrra e saj mbetet të garojë për flamurin e Shqipërisë, edhe pse deri më tani nuk ka patur një përgjigje nga strukturat përkatëse në vendin tonë.
Për talentin e jashtëzakonshëm të Mikelës ka folur edhe trajneri i saj, Mauricio Brigenti, i cili e ka përshkruar kështu sportisten shqiptare: “Mikela ka treguar mjeshtëri në disiplinën kata, me aftësitë e saja në lëvizjet komplekse, me elegancë dhe precizion të lartë. Në medaljen e argjendit që fitoi në Europianin e Francës, në disiplinën kumite individuale, Mikela tregoi teknikë të shkëlqyer, duke triumfuar ndaj rivaleve më eksperte, falë shpejtësisë, potencës dhe precizionit të saj”, shprehet trajneri Brigenti.
