Kryeministri i Kosovës, Albin Kurti, është takuar me kryeministrin e Shqipërisë, Edi Rama dhe kryetarin e Aleancës për Shqiptarët në Maqedoninë e Veriut, Arben Taravarn.
Kurti tha se shqiptarët më shumë sesa fat, e kanë vetëdije historike e kombëtare orientimin e qartë euro-atlantik dhe ndërtimin e aleancave mbi vlera e bindje. Ai u shpreh se shqiptarët duhet të jenë krah për njëri-tjetrin për zhvillim.
“Sfidat shpesh i kemi të ngjashme e të përbashkëta. Shërbimin ndaj qytetarëve duhet përherë ta kemi qëllim të palëkundur të angazhimit politik. E në rrugë e sipër na duhet të jemi krah për njëri-tjetrin, për zhvillim, demokratizim, reformë, progres dhe mirëqenie”, shkroi Kurti në një postim në rrjetet sociale.
Takimi mes Kurtit, Ramës e Taravarit u mbajt pas takimit të liderëve të rajonit për Planin e Rritjes së BE-së të hënën në Shkup, ku u diskutua lidhur me integrimin e rajonit në tregun e përbashkët europian.
