Lëvizja Bashkë ka paralajmëruar zhvillimin e një proteste të Shtunën në Tiranë. Protesta do të nisë më 11:00 në “Sheshin Skënderbej” dhe ka kryefjalë korrupsionin.
“Korrupsioni po gërryen bazat e shtetit dhe shoqërisë shqiptare. Një grusht politikanësh dhe oligarkësh kanë përvetësuar pasuritë më të mëdha publike, duke dëbuar çdo vit dhjetëra mijëra shqiptarë nga vendi”, thuhet në një reagim nga “Lëvizja Bashkë”.
“Për shkak të korrupsionit, shumica dërrmuese e të moshuarve marrin 8000 deri në 17.000 lekë pension. Për shkak të korrupsionit, pagat janë shumë të ulëta. Për shkak të korrupsionit, në Shqipëri nuk ka ligj të minimumit jetik. Për shkak të korrupsionit, ne paguajmë qimet e kokës në spitale. Për shkak të korrupsionit, në Tiranë vdesin çdo vit rreth 3000 qytetarë nga ndotja e ajrit. Për shkak të korrupsionit, çmimet e ushqimeve janë nga më të lartat në Evropë. Për shkak të korrupsionit, askush nuk vlerësohet sipas meritës. Për shkak të korrupsionit, fëmijët nuk kanë fusha ku të luajnë. Për shkak të korrupsionit, në Shqipëri nuk ka barazi përpara ligjit. Për shkak të korrupsionit, pabarazia ekonomike është ekstreme”, thuhet më tej në njoftim.
“Bashkimi kundër korrupsionit dhe të korruptuarve është e vetmja rrugëdalje nga qorrsokaku ku ka hyrë shoqëria shqiptare. Ndaj ju bëjmë thirrje të bashkohemi në një protestë të madhe duke kërkuar që të gjithë të korruptuarit të vihen përpara drejtësisë. Koha nuk pret më”, mbyllet reagimi.
