Një i ri është arrestuar dhe një tjetër është shpallur në kërkim nga policia e Tiranës, që ka sekuestruar mina me telekomandë.
Në pranga u vu Jesar Shabaj, 20 vjeç, banues në Tiranë (dhe në Shkodër) dhe u shpall në kërkim vëllai i tij, shtetasi Jaser Shabaj, 23 vjeç, banues në Postribë, Shkodër.
Blutë kanë sekuestruar 2 mina me telekomandë, me eksploziv C4 me peshë 300 gram, të programuara për shpërthim në distancë, që sipas policisë, do të përdoreshin nga dy vëllezër.
Hetimet për rastin, sipas të njëjtave burime, janë ndjekur me metoda speciale.
“Gjatë veprimeve hetimore të kryera në kuadër të procedimit për këtë rast, janë gjetur dhe sekuestruar, në cilësinë e provës materiale, 2 mina me telekomandë, me lëndë eksplozive C4 peshë 300 gram, të programuara për shpërthim në distancë (të pajisura me aparat celular dhe me kapsolla detonatore), të cilat dyshohet se do të përdoreshin për kryerjen e ngjarjeve të rënda kriminale. Gjithashtu janë sekuestruar aparati celular i 20-vjeçarit të ndaluar si dhe një përforcues grushti (dorezë metalike)”, njofton policia.
