I dënuari përjetë Sokol Mjacaj që ekzekutoi Arben Lleshin brenda burgut të sigurisë së lartë në Peqin dhe plagosi Indrit Shaqjen, është marrë në pyetje nga grupi hetimor në lidhje me ngjarjen e rëndë.
Burime mediatike bëjnë me dije se Mjacaj ka dhënë detaje për ngjarjen dhe ka zbardhur mekanizmat.
Sakaq, Sokol Mjacaj ka ankimuar në Gjykatën e Posaçme vendimin për izolimin e tij në regjimin “41 Biss”.
Kujtojmë se më 15 dhjetor 2023, ministri i drejtësisë Ulsi Manja bëri publik vendimin për izolimin e Sokol Mjacajt në sistemin 41 Biss, pasi kishte të dhëna se komunikonte me jashtë dhe vazhdonte aktivitetin kriminal nga qelia. Por pasi mësoi këtë lajm, Sokol Mjacaj mori armën dhe u afrua tek qelia ku ndodhej i dënuari për vrasje Arben Lleshi. Ai thirri në emër të dënuarin të cilin e qëlloi me dy plumba duke lënë të plagosur edhe shokun e qelisë Indrit Shaqja.
Vrasja dyshohet se u krye me pagesë, për hakmarrje dhe shkaktoi arrestimin e drejtorit të burgut, shefit të policisë dhe 10 punonjësve të sigurisë.
