Partia “Lëvizja Bashkë”, e drejtuar nga Arlind Qori, ka lajmëruar një protestë ditën e shtunë, në orën 11:00, në sheshin “Skënderbej”, për t’i kërkuar drejtësisë që të nxjerrë përpara ligjit të gjithë politikanët që kanë vjedhur lekët e shqiptarëve.
Në një reagim në rrjetet sociale, “Lëvizja Bashkë” shkruan se qytetarët duhet të ushtrojmë trysni mbi institucionet e drejtësisë që të gjithë pushtetarët dhe ish-pushtetarët e korruptuar të japin llogari përpara ligjit. Ajo thekson se në krye të sistemit korruptiv janë ata që e kanë qeverisur Shqipërinë dekadat e fundit dhe që kanë vjedhur dhe vazhdojnë të vjedhin për vete, për familjarët dhe partitë e tyre.
Reagimi i plotë:
TË GJITHË PËRPARA DREJTËSISË
Shqipëria është një nga gjashtë vendet më të korruptuara të Evropës. Institucionet publike shpërdorojnë rreth 1 miliard euro në vit.
Në Shqipëri vidhet nëpërmjet prokurimeve, koncesioneve, lejeve të ndërtimit, ligjit për investitorët strategjikë dhe monopoleve.
Korrupsioni i gjithanshëm bllokon zhvillimin ekonomik të qëndrueshëm, thellon varfërinë, mban të ulëta pagat dhe pensionet, çon në ekstrem pabarazitë, degradon shërbimet publike, zhvlerëson meritën dhe nxit emigrimin masiv.
Në krye të sistemit korruptiv janë ata që e kanë qeverisur Shqipërinë dekadat e fundit. Ata që kanë vjedhur dhe vazhdojnë të vjedhin për vete, për familjarët dhe partitë e tyre.
Ne, qytetarët e nëpërkëmbur nga keqqeverisja, duhet të ngremë zërin kundër korrupsionit.
Ne duhet të ushtrojmë trysni mbi institucionet e drejtësisë që të gjithë pushtetarët dhe ish-pushtetarët e korruptuar të japin llogari përpara ligjit.
Ne, BASHKË, duhet të hedhim themelet e një qeverisjeje të ndershme.
Koha s’pret më!
PROTESTË
E shtunë, 20 janar, ora 11:00 në Sheshin Skënderbej.
