Tirana arriti një përmbysje spektakolare ndaj Dinamos në derbi duke fituar me rezultatin 2-3 teksa ishte në disavantazh të dyfishtë nga minuta e 46-të. Një fitore që shërben si frymëmarrje për bardheblutë që nisën vitin në mënyrën më të mirë.
Tirana ka nevojë për pikë dhe oshilacionet e shumta kanë qenë problemi kryesor këtë sezon. Ekipi nuk po gjen qëndrueshmërinë në rezultate, por kalendari i vjen disi në favor në ‘letër’ përpara një ndeshjeje shumë të rëndësishme për fatet e sezonit, derbin me Partizanin.
E rradhës për Tiranën është sërish në Durrës ku sfidon Teutën, skuadrën e fundit të renditjes. Pas çerekfinaleve të Kupës, bardheblutë presin Skënderbeun në shtëpi e më pas do të shkojnë në Kukës për t’u përballur me verilindorët e vendit të para-fundit. Tjetra është ndaj Erzenit në shtëpi ku favorit mbeten sërish kryeqytetasit.
Veç Skënderbeut, 3 skuadrat e tjera rreshtohen të fundit në renditje dhe llogjikisht janë më të dobëta në letër. Një shans ideal i Tiranës për të hedhur pas momentin negative dhe për t’i dhënë një tjetër marsh kampionatit për të shkuar në derbin ndaj Partizanit me gjendjen më të mirë të mundshme.
Megjithatë, kampionati shqiptar ka treguar gjithmonë se parashikimet janë të kota dhe fusha e lojës prodhon surpriza nga java në javë.
