Transferimi i Lazar Samardzic shndërrohet sërish në telenovelë merkatoje.
Verën e kaluar mesfushori serb kreu edhe testet mjekësore me Interin, por një kokëfortësi e babait të tij dhe ndryshim i pretendimeve në minutën e fundit, bëri që firma mbi kontratë dhe transferimi te zikaltrit të dështonte.
Mesfushori u rikthye te Udinese, teksa në fillim të janarit ishte Napoli ai që bëri hapa përpara për ta transferuar.
Por kur pritej që të udhëtonte drejt kampionëve në fuqi, transferimi ngeci sërish, teksa edhe këtë herë shkak u bë babai i tij.
Së fundi nga situata duket se është gati të përfitojë Juventusi, që ka nisur kontaktet me Udinesen, por edhe agjentët e Samardzic, për të studiuar mundësinë e transferimit të futbollistit në Torino.
Bardhezinjtë nuk kanë ndërmend të paguajnë 25 milionët e kërkuara nga Udinese në janar, por duan të bindin mesfushorin që të transferohet në Torino në verë, duke i ofruar edhe një pagë prej 3 milionë eurosh, përveç mundësisë për të luajtur me patriotin e tij, Dusan Vlahovic.
