Legjenda e futbollit botëror, Franz Beckenbauer është shuar në moshën 78-vjeçare. Ish-futbollisti, trajneri e drejtuesi i njohur sportiv gjerman, i cili mbajti për shumë vite nofkën “Kaizeri”, është ndarë nga jeta të dielën, por lajmi u bë zyrtar vetëm sot nga familja e tij me një njoftim që iu shpërnda mediave.
“Është me trishtim të madh që lajmërojmë se burri dhe babai, Franc Bekenbauer, u nda nga jeta paqësisht në gjumë gjatë ditës së djeshme, të dielën, i rrethuar nga familja e tij. Ne ju kërkojmë që të na lejoni ta vajtojmë në qetësi dhe të përmbaheni nga drejtimi i pyetjeve”, shkruhej në njoftimin që u shpërnda për mediat nga familja e ikonës së futbollit botëror.
Beckenbauer lindi në vitin 1945 dhe cilësohet nga shumëkush si një nga futbollistët më të mëdhenj të të gjitha kohëve, Ai ishte kapiteni legjendar i Gjermanisë që u shpall Kampione Bote në vitin 1974 pas fitores 2-1 në finale kundër Holandës.
Gjendja e tij shëndetësore ishte përkeqësuar ndjeshëm në vitet e fundit. Ai kishte pasur probleme me syrin, më pas një operacion në zemër të shoqëruar nga Parkinsoni dhe demenca e pjesshme.
Ai kishte vuajtur shumë vitet e fundit për shkak të këtyre situatave shëndetësore dhe nuk kishte marrë pjesë në asnjë aktivitet publik, për të shmangur prishjen e imazhit që kishte krijuar gjatë një karriere shumë të suksesshme.
Beckenbauer kishte vite që ishte tërhequr nga jeta publike. Kjo, për shkak të vdekjes së djalit të tij Stefan në vitin 2015 e sidomos pas akuzave për ryshfete që kishte marrë në periudhën kur ai ishte drejtues i Komitetit Organizator të Botërorit 2006.
- Karriera e Beckenbauer
Përgjatë një karriere të shtrirë thuajse në dy dekada, një pjesë të madhe e saj e kaloi në klubin e tij të fëmijërisë Bayern Munich. Beckenbauer iu bashkua skuadrës së Bayernit në vitin 1958 dhe bëri debutimin e tij në ekipin e parë në 1963.
Si kapiten nga viti 1971, ai fitoi një numër të jashtëzakonshëm trofesh, si 4 herë Bundesligën gjermane (1968–69, 1971–72, 1972–73, 1973–74), 3 Champions League (1973–74, 1974–75, 1975–76) dhe Kupën e Botës të vitit 1974 me Gjermaninë.
Përveç trofeve, Beckenbauer fitoi gjithashtu një sërë nderimesh personale, duke përfshirë dy çmime të “Topit të Artë” si mbrojtës (1972,1976) – një gjë e rrallë në atë kohë dhe ende sot e kësaj dite.
Pasi i vari këpucët për herë të fundit, pas një qëndrimi të shkurtër në SHBA në New York Cosmos, Beckenbauer iu drejtua menaxhmentit, duke e udhëhequr Gjermaninë Perëndimore drejt fitores në Kupën e Botës 1990.
Ish-ylli i Bayern Munich, ka qenë një ndër të rrallët që e ka fituar Kupën e Botës si lojtar dhe si trajner (1990), së bashku me Didier Deschamps të Frances dhe Mario Zagallo të Brazilit.
Beckenbauer u përjetësua në një film – të titulluar Der Kaiser – i realizuar për jetën e tij në 2022.
