Një vrasje me armë zjarri ka ndodhur në Vlorë mbrëmjen e kësaj të diele. Viktima është Gëzim Sinomati, 23 vjeç, i ekzekutuar në banesën e tij në lagjen ‘Hajro Çakërri’, rreth orës 22:00.
Në një njoftim zyrtar, policia thotë se i riu dyshohet se është qëlluar me armë zjarri në rrethana ende të paqarta. Ndërkaq, burime policore bëjnë me dije se ka dyshime që Gëzim Sinomati, i cili kishte pak kohë që ishte kthyer nga Belgjika, të jetë qëlluar me snajper në pjesën e kokës teksa ka dalë në ballkonin e banesës. Ekzekutori dyshohet se e mbante në vëzhgim nga një ndërtesë në ndërtim përballë, nga ku edhe ka qëlluar.
Zyrtarisht, policia njoftoi se është rrethuar zona ku ndodhi vrasja dhe janë ngritur pika kontrolli në hyrje dhe në dalje të qytetit si dhe përgjatë rrugëve që lidhin njësitë administrative, me qëllim kapjen e autorit apo autorëve. Grupi hetimor po vijon punën për sekuestrimin e çdo prove materiale, ndërsa në ndihmë të Policisë Vendore janë nisur Forcat Speciale Renea, Forcat Kombëtare të Sigurisë dhe Delta Forcë, shtojnë të njëjtat burime.
Gëzim Sinomati është djali i Sokol Sinomatit, i njohur me nofkën nofkën “Buzderi” dhe si anëtar i bandës së Gazmend Brakës alias “Gaxhai”, në vitin 1997 në Vlorë.
Gjithashtu, në vitin 2022, xhaxhit të 22-vjeçarit, po ashtu person me precedent penalë, i është vënë tritol në makinë.
Dyshimet paraprake të grupit hetimor janë se Gëzim Sinomati është ekzekutuar për hakmarrje. Një tjetër pistë që po hetohet janë dhe konfliktet e mundshme që i riu mund të ketë pasur jashtë vendit.
“Forcat Shqiponja, Operacionale, Delta, e Forcat Kombëtare të Sigurisë janë në ndjekje të autorëve, të ngjarjes ku mbeti i vrarë me armë zjarri shtetasi G. S., 23 vjeç. Autorët dyshohet se kanë braktisur mjetin tip ‘BMW’, në lagjen ’24 Maji’, duke e djegur dhe janë larguar duke përfituar nga errësira. Është rrethuar zona në një perimetër të gjerë të sigurisë dhe vijon kontrolli. Në mbështetje dhe Forcat Renea për kontrollin e zonës ku dyshohet se janë larguar autorët. Ndërkohë Grupi i Posaçëm hetimor i ngritur për këtë ngjarje po vijon punën nën drejtimin e Prokurorisë për sekuestrimin e çdo prove materiale që do ti shërbejë zbardhjes së rrethanave të ngjarjes dhe identifikimit të autorëve”, njofton policia.
