Dan Hutra, autori i vrasjes së tre grave më 1 Mars 2023 në Tiranë, ka tentuar arratisjen nga burgu i Fierit, ku ndodhet nën masën e sigurisë së arrestit me burg.
Drejtoria e Burgjeve konfirmoi se rreth orës 11:25, Dan Hutra u kap duke tentuar për t’u arratisur nga qelia. Plani i arratisjes, sipas të nëjtave burime, ishte i koordinuar nga Hutra në bashkëpunim me tre të paraburgosur të tjerë: Martin Kapllani, Geraldo Veizaj dhe Feti Kovaçi. Të tre janë të izoluar në burgun e Fierit nën masën e sigurisë së arrestit me burg, të akuzuar për vjedhje.
“Në dhomën ku ishin të akomoduar, të paraburgosurit kishin nisur prerjen e zgarës së dritares me mjete te improvizuara. Gjatë kontrollit nga punonjësit e sigurisë, u konstatua se edhe në dhomën nr. 15, ku ishte i akomoduar i burgosuri me potencial të lartë rrezikshmërie, Dan Riza Hutra, ishin fshehur mjete për arratisje, konkretisht: një çarçaf i përshtatur si litar dhe mjete prerëse të improvizuara”, njofton drejtoria e burgjeve, ndërsa mbetet e paqartë sesi këto mjete janë futur në qeli.
Raporte të insitucioneve ligjzbatuese të publikuara së fundmi në media kanë zbuluar se si anëtarët e krimit të organizuar dhe ish-zyrtarët e lartë të Partisë Socialiste gëzojnë privilegje dhe kushte të favorizuara në burgje, në dëm të sigurisë dhe rregulloreve për trajtimin e të dënuarve.
Dështimi i sigurisë u dëshmua nga ngjarje e paprecedent e ndodhur në 15 Dhjetor brenda burgut të sigurisë së lartë në Peqin. Aty, një i dënuar përjetë për vrasje, ekzekutoi me armë zjarri një tjetër të burgosur. Krimi mori përmasa groteske teksa për autorin Sokol Mjacjaj, ministri i Drejtësisë Ulsi Manja kishte njoftuar më herët gjatë ditës së do të futej nën regjimin e rreptë “41bis”. Vetë Mjacaj, sipas dëshmisë së drejtorit të burgut të administruar nga prokuroria, deklaroi se e kreu krimin i nxitur nga deklarata e ministrit.
Kush është Dan Hutra
Dan Hutra është autori i një ngjarje që terrorizoi qytetarët e kryeqytetit më 1 Mars të vitit të kaluar, kur plagosi me thikë një grua dhe vrau tre të tjera me armë zjarri. Nën akuzë për pesë vepra penale, Hutra është lënë nën masën e arrestit me burg në pritje të dënimit për krimet e 1 Marsit, ndërsa gjatë dëshmisë dhënë në gjykatë, ai nuk ka shprehur pendesë për vrasjet.
Lexo edhe:
Dan Hutra lihet në qeli: Vrasjet i bëra me vetëdije, jam dënuar padrejtësisht
