Sulmuesi i njohur kroat, Nikola Kalinic, i është rikthyer sërish futbollit. Ish-sulmuesi i Milanit dhe disa klubeve të tjera europiane i është bashkuar sërish Hajdukut të Splitit.
Ai kishte vendosur të pushonte për disa muaj pas përfundimit të sezonit të shkuar dhe ka firmosur sërish me klubin e famshëm kroat. Kontrata e 35-vjeçarit është e vlefshme deri në fund të sezonit aktual, 2023-2024.
Ai ishte te Hajduku deri në fund të qershorit të vitit të shkuar dhe më pas vendosi për një periudhë ndërprerje nga futbolli. Kalinic ka ndryshuar mendje dhe tani ka vendosur ta ndihmojë ekipin e zemrës. Kontrata është diçka e pazakontë, pasi Hajduku do ta paguajë 1 euro në muaj për ish-sulmuesin e kombëtares kroate.
“Pagën” prej 1 eurosh në muaj të Kaliniçit e ka konfirmuar drejtori sportiv i Hajdukut, Mindaugas Nikolicius.
“Sa u takon financave, ishte marrëveshja më e lehtë e arritur për tre vjet sa jam te Hajduku. Jemi marrë vesh për pagë prej 1 eurosh. Ai dëshiron ta ndihmojë Hajdukun dhe ta fitojë titullin e kampionit dhe ky është motivi për të cilin u kthye”, ka thënë Nikolicius.
