Nëse matja e mirëqenies për një pjesë të vogël të shoqërisë janë milionat në llogaritë bankare, apo stoqet e shumave cash, për një pjesë të madhe të familjeve shqiptare është ushqimi i përditshëm. Fondacioni Human është një prej atyre organizmave të vëna në shërbim të shtresave në nevojë, veçanërisht të personave me probleme shëndetësore.
Në qindra familje pakot ushqimore të ofruara nga Fondacioni Human, janë jo vetëm plotësim i nevojës për tu ushqyer dhe jetuar, por mbi gjithçka të mendojnë se “nuk jemi vetëm”.
Pakot me ushqime dhe veshmbathje të siguruara nga Fondacioni Human kanë mbërritur në mjaft familje. Lumturia e një fëmije, lotët e gëzimit të një prindi se dikush po iu gjendet në ditët e vështira janë shumë herë më me vlerë se vetë vlera financiare e çdo pakoje me ndihma. Kjo ishte dhe mbetet moto e këtij fondacioni i cili troket në ato dyer të vjetëruara ku shteti se ka kapërcyer pragun, duke u mjaftuar me atë shumë qesharake të asistencës sociale, apo të kempeve në rastet e të sëmurëve. Pikërisht kategoria e qytetarëve me probleme të shëndetit janë edhe më të prekurat. Varfëria në mjaft raste e tejskajshme shtrihet kryesisht në zonat rurale, aty ku banorët trajtohen si statistikë ku pushteti lokal dhe qendror i sheh si statistikë në listën e votimit.
Megjithatë Fondacioni Human, sidomos në ditët e ndërrimit të viteve ka shpërndarë dhe po shpërndan qindra pako me ushqime, veshmbathje dhe lodra për fëmijët. Një vlerë e shtuar nga Fondacioni Human, moto e së cilës mbetet ndihma për shtresat në nevojë, që jo vetëm të shuajnë urinë por të rrisin shpresën.
