Edhe pse opozita ndodhet në gjendjen më të keqe të saj dhe kryeministri shtrëngon gjithnjë e më shumë darën e pushtetit ndaj institucioneve të vendit dhe kundërshtarëve politikë, “opozitari” Lulzim Basha gjen kohë dhe bën festë.
Mbrëmjen e djeshme ai mblodhi ata pak mbështetës të tij në një prej lokaleve në zonën e ish-Bllokut, teksa për të kopjuar “show-n” e kryeministrit Edi Rama, ai u fut dhe në rolin e “DJ”.
Një prej atyre që reaguan ndaj kësaj feste ka qenë dhe deputeti i PD-së, Edmond Spaho, i cili në një postim në rrjetet sociale iu drejtohet me fjalët “Nesër Babloku do ju çojë tek lodrat… që të harboni edhe hani më shumë”.
Por, ky reagim i Spahos, nuk është pritur mirë nga deputeti i Lulzim Bashës, Kreshnik Çollaku, i cili ka kaluar edhe me ofendime drejt kolegut demokrat, pasi i drejtohet me fjalët “që Mondi nuk mbush shumë edhe kjo duket”..
“Doni te njihni c eshte enverizmi i 2023 ? Ja shikoni Mondin si merzitet e inatoset pse disa miq festojne ne pune e qejf te tyre. Ne kohe te PPSH keta si Mond inatqari qe urrenin qejfet e te tjereve mund te te degdisnin internimeve per shfaqje te huaja ne raste te ngjashme. Me vjen keq per Mondin,por ne ia kaluam super. Qe Mondi ka inat kjo duket,qe Mondi nuk mbush shume edhe kjo duket,por une nuk gjej dot..,ne cti bejme Mondit ???” – shkruan Çollaku.
Kujtojmë se kjo nuk është hera e parë që Kreshnik Çollaku përplaset me deputetë e PD-së, pasi vlen të theksohet dhe rasti kur u përplas fizikisht me deputetin Dashnor Sula, në një prej komisioneve parlamentare, kur ai u bashkua me deputetët e mazhorancës.
