Gjykata e Lartë ka rrëzuar ditën e sotme vendimin e Gjykatës Apelit të marrë më 3 Mars për vulën e Partisë Demokratike, e cila kishte vendosur që të rikthente çështjen në Shkallën e Parë.
Kolegji Civil i Gjykatës së Lartë, i cili përbëhej nga gjyqtarët, Artur Kalaja, Ervin Pule dhe Dariel Sina, ka vendosur që ta rikthejë sërish çështjen në Gjykatën e Apelit, por me një tjetër trup gjykues.
“Kolegji Civil arriti në përfundimin se Gjykata e Apelit të Juridiksionit të Përgjithshëm Tiranë ka lejuar shkelje procedurale që e bëjnë të cenueshëm vendimin e dhënë prej saj. Kolegji konstaton se, Gjykata e Apelit të Juridiksionit të Përgjithshëm Tiranë nuk i ka dhënë përgjigje kërkesave të palëve në ankimet respektive, ndërkohë që kryesisht ka marrë në shqyrtim çështje për të cilat palët nuk i kanë ngritur si pretendime në ankim, dhe që gjithsesi nuk përbëjnë shkak për prishjen e vendimit dhe dërgimin e çështjes për rishqyrtim. Kolegji vlerëson se pretendimet e ngritura në ankimet e paraqitura pranë Gjykatës së Apelit të Juridiksionit të Përgjithshëm Tiranë janë çështje të cilat mund të zgjidheshin vetë nga ajo gjykatë.” – thuhet në vendimin e Gjykatës së Lartë.
Pra, Gjykata e Lartë e detyron Apelin që të marrë një vendim, nëse qëndrimi i gjyqtarit Agron Zhukrit, i cili ia dha vulën Sali Berishës është i drejtë apo i gabuar. Pra është Gjykata e Apelit, ajo që duhet të thotë fjalën e fundit, se kujt i takon vula e PD-së, Sali Berishës apo i Lulzim Bashës, e jo ta kthente çështjen në shkallën e parë.
Kujtojmë se më 3 Mars të këtij viti, Gjykata e Apelit me trupë gjykuese të përbërë nga relatore Elona Mihalin, anëtarë Astrit Kalanë dhe Irda Kacerja prishi vendimin e gjyqtarit Agron Zhukri i Gjykatës së Shkallës së Parë, i cili vendosi të njohë Kuvendin e Sali Berishës, të mbajtur me 11 dhjetor 2021, duke e rikthyer sërish çështjen për rigjykim në Shkallën e Parë.
Tashmë, me vendimin e sotëm të Gjykatës së Lartë, ngelet ende në fuqi vendimi i gjyqtarit Agron Zhukri, i cili ka njohur Sali Berishën si kryetar të Partisë Demokratike.
Me këto vendime të gjykatave, duket si një zvarritje e procesit gjyqësor të vulës së Partisë Demokratike, teksa është kuptuar prej kohësh se shumicën në atë parti e ka Sali Berisha.
Ndërkohë, pas vendimit të Gjykatës së Lartë, ka ardhur dhe një reagim nga grupi i Lulzim Bashës, teksa e konsideron si një tjetër hap drejt vendosjes se drejtësisë së vonuar për çështjen e PD
“Vendimi i sotëm i Gjykatës së Lartë është një tjetër hap drejt vendosjes se drejtësisë së vonuar për çështjen e PD. Partia Demokratike mbetet e bindur qe kjo çështje, peng i procedurave juridike do të gjejë zgjidhjen e duhur dhe ligjore pa vonesat e shkaktuara nga ata që minojnë drejtësinë dhe të tjerët që i tremben forcimit të opozitës.” – thuhet në reagim.
Kujtojmë se ditën e sotme, gjatë kohës që zhvillohej seanca në Gjykatën e Lartë, kreu i PD-së, Sali Berisha thirri mbështetësit e tij, në një protestë para godinës ku nuk nguroi që këtë institucion të drejtësisë ta konsiderojë si një vegël të kryeministrit Edi Rama, duke shtuar më tej se po përdoret njëlloj si bisturia në duart e kriminelit, për të masakruar simbolin e pluralizmit politik.
VENDIMI I GJYKATË SË LARTË
