Dejvi Bregu ka fshirë nga rrjeti social Instagram skuadrën e Umraniyespor, ndërsa vetëm 1 foto ka “mbijetuar”. Kështu sulmuesi 28-vjeçar mbante më parë emrin e skuadrës turke në “bio” dhe po ashtu as foto e prezantimit nuk është më. Klubi dhe Bregu nuk e ndjekin njëri-tjetrin.
Zërave për largim të mundshëm në janar, u shtohet fakti se në dy takimet e fundit nuk është grumbulluar me skuadrën e Umraniyespor. Po ashtu gjatë këtij sezoni ka marrë shumë pak minuta pa vuajtur nga dëmtim dhe kontrata i skadon në fundin e sezonit.
Nuk do ishte aspak çudi nëse Bregu do kthehej në Shqipëri ku spikati me skuadra të ndryshme si Flamurtari, Luftëtari, Skënderbeun dhe Teutën. Në Turqi luajti me Boluspor para se të transferohej te skuadra aktuale e Umraniyespor në Ligën e Parë.
Dejvi Bregu u largua nga Shqipëria duke fituar titullin kampion me Teutën, duke qenë golashënues i sezonit dhe po ashtu “Lojtari i Vitit 2021”. Eksperienca në Turqi zgjati më shumë se 2 vite, ndërsa me interes pritet të shihet e ardhmja e sulmuesit vlonjat.
