Vijon të jetë ende aktiv zjarri në pallatin 12-katësh ku ndodhet dhe qendra tregtare “Metropol”, ku tre katet e para janë dyqane dhe katet e tjera apartamente.
Mësohet se deri në këto momente kanë shkuar 39 persona në spital me probleme frymëmarrjeje. Mes të asfikasuarve janë edhe dy fëmijë dhe dy efektivë. Këta të fundit janë asfiksuar ndërsa kanë marrë pjesë në operacionet e shpëtimit të personave të bllokuar në ndërtesë. Të gjithë janë jashtë rrezikut për jetën.
Policia bën me dije se zjarri ka rënë rreth orës 14:40 dhe dyshohet se ende brenda saj ka njerëz. Nuk ka shifra të sakta se sa persona ka brenda në godinë dhe se si është gjendja e tyre.
Shkaku i rënies i zjarrit dyshohet se është bërë një shkëndijë elektrike. Zjarri ka nisur fillimisht në katin e dytë të Qendrës tregtare dhe më pas është përhapur edhe në katet e tjera.
Dyshohet se ende ka banorë të bllokuar brenda banesave të tyre, ndërsa nga qendra tregtare, e cila përbehet nga tre kate, thuhet se janë evakuuar të gjithë personat që ndodheshin aty.
Forcat Zjarrfikëse po punojnë për të shuar flakët dhe për të bërë evakuimin e plotë. 7 zjarrfikëse dhe 8 ambulanca ndodhen në vendngjarje. Në ndihmë të zjarrfikëses së Lushnjës kanë mbërritur edhe zjarrfikëse nga Fieri e Patosi e Tirana.
