Tirana ka shpartalluar me rezultatin 0-5 Egnatian kryesuese duke marrë një fitore bindëse në Rrogozhinë.
Bardheblutë e Julian Ahmatajt rikthehen kështu te fitorja pas 4 ndeshjeve. Tirana arriti të shënonte golin e parë në minutën e 25’, ku Haxhiu ishte autori i golit dhe vetëm ai ka mjaftuar në 45 minutat e parë për këtë rezultat.
Në pjesën e dytë ndodhën më pas të gjitha të tjerat. Egnatia ndëshkohet me kartonin e kuq në minutën e 67’, pasi Aleksi ndërhyri ashpër ndaj Latifit.
Që nga ai moment Tirana fillon të luajë tenis me rrogozhinasit. Në minutën e 67’ ishte Latifi i cili shënon për rezultatin 0-2. Pak minuta më vonë, në të 74’, Haxhiu trefishon shifrat. Por nuk mjafton me kaq, pasi në të 84’ konfirmohet goli i katërt i Abazaj dhe në të 87’ Latifi i jep shuplakën Egnatias.
Me këtë rezultat, Tirana shkon në vendin e tretë me 26 pikë, ndërsa Egnatia mbetet në vendin e parë me 37 pikë.
Një mbyllje e mirë e vitit për kryeqytetasit, ndërsa rrogozhinasit, pasi humbën finalen e Superkupës, mposhten edhe në kampionat, e treta për këtë sezon, që të tria herët në fushën e vet.
