Një kontingjent i Forcave të Sigurisë së Kosovës ka mbërritur sot në Shqipëri për një operacion kërkim-shpëtimi.
Lajmin e ka bërë me dije vetë FSK në një postim në rrjetet sociale, ku thuhet se kontingjenti i specializuar i FSK-së është dërguar në Shqipëri për të gjetur trupin e një shtetasi kosovar, i cili u zhduk në lumin Buna.
“Me kërkesë të autoriteteve të Republikës së Shqipërisë, sot në orët e para të mëngjesit një kontigjent i specializuar i Forcës së Sigurisë së Kosovës ka zbarkuar për një mision humanitar të kërkim-shpëtimit për gjetjen dhe nxjerrjen e trupit të shtetasit të Kosovës që humbi jetën tragjikisht në lumin Buna”, thuhet në njoftimin e FSK-së.
Kujtojmë se më 17 dhjetor, 65-vjeçar, Hashim Syla, banues në Mitrovicë, dyshohet se teksa ka qenë duke peshkuar në bregun e lumit Buna, ka rrëshqitur aksidentalisht dhe ka rënë në lumë. Shërbimet e Policisë shkuan në vendin e ngjarjes dhe vijuan kërkimet për gjetjen e trupit të 65-vjeçarit, në bashkëpunim me polumbarët e “RENEA-s”, por pa rezultat.
