Policia e Shtetit ka administruar një informacion se një grup kriminal kishte planifikuar të vriste ish-drejtorin e Përgjithshëm të Policisë së Shtetit, Gledis Nanon.
Bëhet fjalë për një ngjarje që është regjistruar rreth 3 muaj më parë. Sipas burimeve mediatike, një anëtar shumë i rrezikshëm i një organizate kriminale ka planifikuar të vrasë ish-drejtorin e Policisë së Shtetit.
Paraprakisht dyshimet janë për shkak të hetimeve për të njëjtin grup në kohën që ishte drejtues i Anti-terrorit. Nuk dihet saktësisht në çfarë kushtesh është kuptuar nga policia, por blutë asnjëherë nuk kanë bërë me dije për një planifikim të tillë të mundshëm për eliminimin e Nanos.
Po ashtu mediat raportojnë se Gledis Nano jo vetëm që nuk është vënë në dijeni nga Policia, por ndaj Nanos dhe familjes së tij nuk janë shtuar as masat mbrojtëse nga policia e shtetit.
Kujtojmë që Nano u shkarkua si drejtor i përgjithshëm i Policisë së Shtetit më 31 gusht 2022 vetëm pas 10 muajsh në detyrë, me argumentin e qeverisë se nuk kishte realizuar objektivat dhe deri sot ende ndodhet jashtë policisë së shtetit.
