Janë zbardhu detaje të reja nga aksidenti automobilistik i regjistruar mbrëmjen e kësaj të premte në zonën e Selitës në Tiranë, ku një automjet i Policisë së Shtetit përfundoi jashtë rruge pas përplasjes me një automjet tjetër.
Burime për TCH bëjnë me dije se në aksident është përfshirë makina e Gardës së Republikës, e cila eskortonte familjen e kryetares së Gjykatës së Posaçme Antikorrupsion, Irena Gjoka.
Punonjësit e Gardës së Republikës që shoqëronin familjen e gjyqtares, do pyeten në polici. Paraprakisht ata kanë shpjeguar se shoferi që shkaktoi aksidentin, i cili është prezantuar si polic nga Elbasani, po udhëtonte me shpejtësi të lartë.
“I bëmë me shenjë që të mos futej në grupin e eskortës”-shpjegon njëri prej tyre, “por ishte e pamundur”.
Këto manovra kanë zgjatur pak çaste përpara se të ndodhë aksidenti. Në makinën e familjes së gjyqtares Irena Gjoka gjendej edhe djali i saj, thonë burime pranë Gardës së Republikës, që po kryejnë analizë të thelluar për aksidentin.
Paraprakisht vendi i ngjarjes krijon bindje të plotë që është aksident automobilistik, por për shkak se krye gjyqtarja po ruhet familjarisht prej Gardës së Republikës do kryhet hetim shterues.
Sipas njoftimit të Policisë më herët, u raportua se si pasojë e aksidentit kishte vetëm dëme materiale.
