Një tjetër person është vënë nën akuzë lidhur me ngjarjen e ndodhur të premten në burgun e Peqint, ku Sokol Mjacaj ekzekutoi me armë zjarri Arben Lleshin. Ai është Indrit Shaqja, i cili mbeti i plagosur.
Në qeli i është gjetur një telefon celular, send i ndaluar për tu mbajtur nga të burgosurit.
“Në vijim të veprimeve hetimore të kryera në kuadër të procedimit penal nr.1459/2023 në datë 19.12.2023 është rikqyrur vendi i ngjarjes, vendi ku është vrarë viktima, që përkon me dhomën e të dënuarit Indrit Shaqja në IEVP Peqin, nga këqyrja e imtësishme e sendeve që ndodheshin në dhome, konkretisht një arke druri është sekuestruar një send telefon celular që i përket të dënuarit Indrit Shaqja”, thuhet në akuzën e prokurorisë së Elbasanit.
“Gjatë pyetjes së tij ai ka pranuar pronësinë e sendit telefon celular dhe në këto rrethana është arrestuar nga policia gjyqësore e SHKBB për nenin 324/a të Kodit Penal”, shton prokuroria.
Në media është raportuar më herët se ka dyshime që Shaqja ka pasur rol në vrasjen e Lleshit nga Sokol Mjacaj. Megjithatë, lidhur me vrasjen nuk ka asnjë akuzë ndaj tij.
