Gjykatën Kushtetuese ka rrëzuar kërkesën e deputetëve të Partisë Demokratike, të cilët kërkuan pezullimin e vendimit të GJKKO-së për masën shtrënguese ndaj Sali Berishës e për rrjedhojë edhe pezullimin e arrestimit të tij.
Ligjvënësit demokratë pretenduan se masat “detyrim paraqitje” dhe bllokimi i pasaportës për kufizimin e daljes jashtë vendit të marra ndaj Sali Berishën më 20 tetor, për privatizimin e klubit Partizani, janë antikushtetuese dhe janë marrë pa u kërkuar paraprakisht autorizimi i Kuvendit.
Në kërkesën drejtuar Gjykatës Kushtetuese, demokratët kërkonin të zgjidhnin konfliktin e kompetencave ligjore mes SPAK dhe Kuvendit, “për sa i përket heqjes ose kufizimit të lirisë ndaj një Deputeti, në të gjitha format, kur këto kufizime të lirisë kryhen nga pushteti gjyqësor pa pyetur, pa kërkuar e pa marrë paraprakisht autorizimin e shprehur të Kuvendit”.
Sipas Gjykatës Kushtetuese, kërkesa e 30 deputetëve të PD-së, nuk plotëson kriteret ligjore paraprake për pranimin e saj për shqyrtim në seancë plenare. Trupa e gjyqtarëve arriti në konkluzionin se deputetët nuk legjitimohen për një ankim të tillë në kushtetuese, por këtë të drejtë e ka Kuvendi.
Sipas logjikës së gjyqtarëve, të drejtën për të vënë në lëvizje trupën kushtetuese në këtë rast e ka vetë Kuvendi i Shqipërisë, i cili do të ishte në këtë rast pala në konflikt që mund të ngrinte pretendimin e cënimit të kompetencave.
Kërkuesi, grupi i deputetëve, nuk legjitimohet t’i drejtohet Gjykatës, pasi referuar mosmarrëveshjes së pretenduar të kompetencave, ai nuk është subjekt në konflikt, pra nuk rezulton t’i jetë marrë ndonjë kompetencë apo të jetë cenuar drejtpërdrejt në ndonjë kompetencë. Grupi i një të pestës së deputetëve, pavarësisht se është pjesë e ushtrimit të veprimtarisë legjislative të Kuvendit, nuk mund të veprojë në emër dhe me tagrat e Kuvendit.
Ky vendim vjen një ditë para se Kuvendit të votojë kërkesën e SPAK për dhënien e autorizimit nga Kuvendi për arrestimin/heqjen e lirisë së deputetit Sali Berisha nëpërmjet zëvendësimit të masës së sigurisë. Të hënën u mblodh dhe Këshilli i Mandateve, ku kërkesa e SPAK u miratua me 6 vota pro, 5 prej tyre i përkisnin mazhorancës dhe një Enkelejd Alibeajt.
SPAK-u i ka caktuar liderit demokrat masën e sigurisë “detyrim paraqitje” si dhe “ndalim të daljes jashtë shtetit”. Megjithatë Sali Berisha ka refuzuar që të parqaqitet në Gjykatë, për këtë shkak SPAK ka kërkuar shtrëngimin e masës së sigurisë në “arrest shtëpi”. Sali Berisha nuk është paraqitur në SPAK në tri datat e caktuara; 6 nëntor, 20 nëntor dhe 4 dhjetor.
Sipas Berishës, GJKKO ka shkelur Kushtetun, duke qenë se nuk kërkoi autorizimin nga Kuvendi për vendosjen e masës së sigurisë “detyrim paraqitje” ndaj tij dhe “ndalim i daljes jashtë shtetit” duke i bllokuar pasaportën.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim, parashikuar nga neni 260 e 25i Kodit Penal.
Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”. Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
Vendimi paraprak i Gjykatës Kushtetuese
