Një Krishtlindje e “dhimbjes dhe zisë” po vjen për izraelitët dhe palestinezët ndërsa lufta në Rripin e Gazës vazhdon të tërbohet, tha Papa Françesku sot, duke bërë thirrje për lutje dhe “duart ndihmëse” për enklavën e shkatërruar palestineze.
“Për banorët e Tokës së Shenjtë po afron një Krishtlindje me dhimbje dhe zi. Ne nuk duam t’i lëmë ata vetëm. Le të qëndrojmë pranë tyre, me lutje dhe ndihmë të prekshme”, shkruan kreu i Kishës Katolike Romake në një postim në platformën X (ish-Twitter).
Izraeli ka nisur një operacion ushtarak në shkallë të gjerë në Rripin e Gazës, duke synuar të çrrënjosë militantët e Hamasit përgjegjës për masakrën e rreth 1200 njerëzve dhe rrëmbimin e gati 240 pengjeve në sulmin e paprecedentë të 7 tetorit në tokën izraelite. Pjesa më e madhe e Rripit të Gazës është rrafshuar nga goditjet e pamëshirshme të forcave të armatosura izraelite, të cilat kanë marrë jetën e afro 20,000 palestinezëve, sipas ministrisë së shëndetësisë të enklavës palestineze të kontrolluar nga Hamasi.
Papa Françesku ka kërkuar vazhdimisht një armëpushim të menjëhershëm në Gaza dhe lirimin e të gjithë pengjeve të Hamasit.
Të dielën, Papa kritikoi Izraelin për përdorimin e taktikave “terroriste” në enklavën palestineze, duke dënuar vdekjen nga zjarri izraelit të dy grave që ishin strehuar në kompleksin që ku ndodhet kisha e vetme katolike në qytetin e Gazës.
