Një 27-vjeçar shqiptar i ka dhënë fund jetës pak ditë më parë në Angli.
Mediat vendase shkruajnë se bëhet fjalë për shtetasin Leonard Farruku, nga Manëza e Durrësit, i cili kishte mbërritur në Angli verën e kaluar, dhe kishte paguar 4000 euro për kalimin. Ai punonte në një anije hotel ku ishin akomoduar azil-kërkuesit, e ankoruar në Dorset në jug-lindje të Anglisë.
Motra e tij Jola Dushku, 33 vjeçe, e cila jeton në Lombardi të Italisë, për mediat vendase shprehet se lajmin e morën vesh nga të afërmit në Mbretërinë e Bashkuar të kontaktuar nga policia që po hetonte vdekjen.
“Kur fola me të herën e fundit, ai më tha se kushtet në atë varkë nuk ishin të këqija, por rojet i trajtonin si kafshë.” tha Dushku.
“Vëllai im, kur mbërriti në MB, i dha Home Office adresën e të afërmve tanë në Londër. Ata u kontaktuan nga policia e cila u tregoi se çfarë kishte ndodhur.
“Sipas të afërmve tanë që janë në kontakt me policinë, Leonardi atë natë në orën 23 të mbrëmjes ka pasur disa probleme dhe është qetësuar nga roja. Në orën 3 të mëngjesit ai u gjet i vdekur. Nuk kemi më shumë detaje se si ai vdiq.”
“Ai erdhi në Mbretërinë e Bashkuar me ëndrrën për të gjetur punë më të mirë dhe, më e rëndësishmja, për të marrë leje të pacaktuar për të qëndruar në MB”, tha Dushku.
Ajo tha se ata kishin humbur të dy prindërit e tyre, një humbje që ndryshoi vëllain e saj. “Leonardi u bë një person tjetër kur nëna jonë vdiq. Vdekja e saj e ndryshoi atë”, tha ajo.
“Unë do të gjej paqen në mendjen time vetëm kur të gjej të vërtetën e asaj që ndodhi atë natë në Bibby Stokholm,” tha ajo.
Ndërkohë një zëdhënës i Home Office tha: “Ky ishte një incident tragjik dhe mendimet tona janë me të gjithë të prekurit. Mirëqenia e të gjithë atyre në kujdesin tonë është e një rëndësie të madhe dhe ne e marrim përgjegjësinë tonë për mirëqenien e tyre jashtëzakonisht seriozisht.
“Kjo tani do të hetohet nga policia dhe mjekësia ligjore. Është e drejtë që të vërtetohen faktet dhe rrethanat që lidhen me këtë vdekje.”
