Policia greke ka ekzekutuar një operacion anti-droge mbrëmjen e të enjtes në Selanik, duke vënë në pranga dy shqiptarë, të cilët kishin zgjedhur një mënyrë të “veçantë” për transportin e lëndës narkotike.
Bëhet fjalë për shtetasit Oltion Ranxha, 48 vjeç, banues në Selanik dhe Fatmir Alizoti, 58 vjeç, banues në Elbasan. Sipas departamentit të anti drogës së Selanikut, dy shqiptarët u ndaluan një një parkim kamionash në zonën Dhiavata ku pas informacioneve të marra në rrugë operative,u gjet brenda disa bidonëve plastikë sasia e lëndës narkotike kanabis sativa.
Droga u kap në kamionin me targa shqiptare “AB 734 JT” i markës Scania. Në cilësinë e provës materiale u gjetën 54 kg kanabis, 2350 euro, 259 gramë kokainë, 3 peshore elektronike, 8 celularë, 143 gramë lëndë e papërcaktuar ende, si dhe u sekuestruan një kamion, një autoveturë dhe një motoçikletë që përdoreshin për trafikimin e lëndës narkotike.
Policia sqaron se lënda narkotike kishte hyrë nga Shqipëria dhe kishte destinacion piacën e narkotikëve të Selanikut. Nga hetimet rezulton se 58 vjeçari kishte rolin e trafikimit të drogës nga Shqipëria më Greqi ndërsa 48 vjeçari kishte rolin e marrësit, magazinimit dhe shpërndarjes së drogës në Greqi.
Nga verifikimet rezultoi se 58 vjeçari ishte në kërkim policor pasi ishte dënuar në mungesë me 5 vjet burg dhe 10.000 euro gjobë për akuzën e trafikut të lëndëve narkotike.
Dy të arrestuarit do të dërgohen në gjykatë për masë sigurie ndërsa hetimet do të vazhdohen nga departamenti i anti drogës së Selanikut me qëllim zbardhjen e plotë së skemës së trafikimit të kësaj organizate.
