Një banesë është përfshirë nga flakët mëngjesin e kësaj të enjte në fshatin Bubullimë të Lushnjës, ku për pasojë humbi jetën një i moshuar.
Viktimë mbeti 82-vjeçari Koli Koçi, ndërsa ka arritur që të shpëtojë bashkëshortja e tij, Kristina Koçi. Më herët u raportua se shkaku i zjarri ka qenë soba me dru e lënë ndezur gjatë natës. Por banorët e fshatit Bubullimë në Lushnjë pretendojnë se zjarri që i mori jetën fqinjit të tyre u shkaktua nga një shkëndijë elektrike.
Sipas fqinjëve të viktimës, çifti i moshuar i bashkëshortëve jetonin vetëm prej vitesh dhe nuk kishin mundësi ekonomike as për tu ushqyer.
“Unë pash flakë në orën 2:30-3:00. Jetonin të dy vetëm prej vitesh. Ishte djegur dhoma e tyre. Të shoqen e tij e kishte kapur trau. E kemi tërhequr ne nga trau. Zjarri ka rënë nga korrenti. Ata nuk kishin asgjë, edhe për të veshur unë u jepja rrobat e mia.”
“Gjynah më erdhi keq. Jetonin vetëm të dy pa njeri. Shkëndija do u ketë rënë. Ka probleme energjia elektrike”-shprehet banori tjetër.
