Para se të ikë ky vit, do përjetojmë edhe një prapavijë tjetër dhe as më pak dhe as më shumë se ajo e Mërkurit famëkeq. Prapavija ndodh sot (13 dhjetor 2023), në Bricjap. Mos u çudit nëse do të vëresh probleme me komunikimin, ndryshime planesh, rikthim të ish-ave; për të gjitha fajëso Mërkurin.
Tani, le të zbulojmë se si do të ndikojë në shenjën tënde:
Dashi
Këtë periudhë, të gjitha sytë kthehen nga ti. Do të jesh shumë person i ekspozuar në publik, njerëzit do të të shohin me detaje, veçanërisht kolegët dhe eprorët. Do të bësh dhe ribësh disa projekte, do të kesh shumë punë dhe do të ndihesh sikur nuk po bën asgjë mirë. Pooor, vazhdo të punësh sepse kur të ikë prapavija, do i kuptosh rezultatet.
Demi
Nëse ke plane për udhëtime, duhet ta shohësh disa herë axhendën dhe të sigurohesh që ke planifikuar çdo gjë dhe sigurisht, mos guxo të vonohesh! Prapavija është një periudhë e vështirë, ndaj mos i jep asnjë arsye Mërkurit që të vendosë në fuqi të gjithë dëshirën për trazira.
Binjakët
Është momenti që të balancosh buxhetin tënd, i dashur Binjak. E kuptojmë dëshirën për të shpenzuar, pasi ka kaq shumë gjëra për të blerë, por sërish, shih me kujdes llogarinë bankare, që të mos ngelesh keq në fund të muajit, sidomos tani në dhjetor.
Gaforrja
Do të kesh ca drama në sferën e dashurisë. Kjo prapavijë do të të sjellë ish-at dhe nëse ke ndonjë çështje të papërfunduar me një person të së shkuarës, do të rikthehet sërish. Do të ketë debate, sherr, do të kesh dëshirë të bësh një përballje të fuqishme, por është më e udhës të presësh. Ç’është më e rëndësishmja, vendos nëse e do këtë person në jetën tënde apo jo.
Luani
Shtrëngo dhëmbët dhe merr frenat e jetës në dorë. Bëj punët e shtëpisë, pastro hapësirën tënde, por edhe jetën nga të gjitha “papastërtitë” dhe situatat që thjesht nuk të shërbejnë. Jeta jote, në këto momente, është një lëmsh i vërtetë dhe fajtori/ja për këtë je vetëm ti.
Virgjëresha
Zonat e romancës, seksit dhe argëtimit do të ndriçohet nga prapavija e Mërkurit. Njerëzit me të cilët ke pasur një marrëdhënie seksuale apo romantike do të rikthehen në jetën tënde, do të qarkullojnë vërdallë dhe mund të të lëkundin paksa. Mendo! Nëse ia vlen, bëje hapin.
Peshorja
Situata në shtëpi duket paksa e ndërlikuar tani. Mund të prishen pajisjet në shtëpi, por ti duhet të presësh sa të largohet prapavija për t’i zëvendësuar. Familjarët, partneri, ose miqtë (varet me kë jeton) do të të shkaktojnë më shumë stres se zakonisht dhe ti do të kesh nevojë të ethshme për rehatinë dhe vetminë tënde.
Akrepi
Së pari, do të kesh mesazhe të shumta gjatë kësaj periudhe, ndaj shiko çdo kanal komunikimi. Së dyti, gjatë kësaj periudhe mezi do të të dalin fjalët për shumë çështje, pasi prapavija do të prekë zonën tënde të komunikimit. Do ta kesh të vështirë të thuash fjalët e duhura, ndaj të këshillojmë të mendohesh shumë mirë para se të flasësh.
Shigjetari
Identiteti yt lidhet shumë me vlerat e tua morale, ndaj ti e ke të vështirë të pranosh një vlerë apo ide tjetër, pasi mendon se është një sulm personal ndaj teje. Këtë periudhë do të ekspozohesh ndaj njerëzve të ndryshëm, do të hasesh me disa sfida dhe mendësi të ndryshme. Në vend që të krijosh debat, ki parasysh që të mësosh më shumë rreth pikëpamjeve të njerëzve të tjerë.
Bricjapi
Duke qenë se prapavija ndodh në shenjën tënde, qartazi do të jesh shenja më e ndikuar. Ish-at do të bëjnë namin, do të të shkruajnë dhe do të të marrin në telefon, mundësi të vjetra në punë do të jenë në vëmendjen tënde, miq nga e shkuara do të jenë gjatë gjithë kohës vërdallë dhe me shumë gjasa, këto do të ndodhin njëkohësisht. Është momenti të nisësh një cikël të ri dhe të largohesh nga e shkuara.
Ujori
Kjo prapavijë ndriçon zonën tënde të izolimit dhe rrethit të njerëzve që mban në jetën tënde. Kjo do të thotë se nuk do të ndërmarrësh veprime domethënëse në lidhjet e reja që do të krijosh, por edhe në ato aktualet. Do të kalosh shumë kohë duke menduar për të shkuarën dhe do të përballesh gjithashtu me ish-at e tu.
Peshqit
Miqtë e tu të mirë, papritur do të sillen çuditshëm. Ata do të duken dhe zhduken si me magji, do të të hedhin kunja, do bëhen thashetheme të ndryshme…Kush po e bën dramën saktësisht? Ç’dreqin po ndodh? Duhet të sqarohesh dhe të saktësohesh fillimisht me veten dhe më pas, të bësh veprime me të tjerët.
