Policia e Kosovës ka arrestuar një person të katërt, që dyshohet si i përfshirë në vrasjen e Liridona Ademajt, krim i organizuar nga bashkëshorti i saj, Naim Murseli.
Mediat kosovare raportojnë se në pranga është vënë shtetasi Tomë Dodaj, 49-vjeç, nga fshati Novosellë i Gjakovës. Dyshohet se ky i fundit u ka shitur armën që është përdor në krim Naim Murselit dhe Granit Plavës.
Liridona Ademaj u vra të mërkurën e 29 nëntorit në Sinidoll të Prishtinës, me porosi të bashkëshortit të saj Naim Murseli. 30 mijë euro ishte shuma që Naim Murseli kishte premtuar për vrasjen e saj. Granit Plava, i cili është arrestuar si ekzekutuesi i krimit ka deklaruar se ka marrë nga porositësi 15 mijë euro, ndërsa i është premtuar se do të merr edhe 15 mijë euro të tjera.
Për këtë krim është arrestuar edhe nipi i Naim Murselit, Kushtrim Kokalla. Ai është edhe anëtar i FSK-së.
Sipas njoftimit të Gjykatës Themelore të Prishtinës, Murseli akuzohet për veprën penale “Vrasje e rëndë në bashkëkryerje”, Plava për veprën penale “Vrasje e rëndë” dhe “Mbajtja në pronësi, kontroll ose posedim të paautorizuar të armëve”, ndërsa Kokalla akuzohet për veprën penale “Marrëveshja për të kryer veprën penale Vrasje e rëndë.”.
Gjykata Themelore në Prishtinë i ka caktuar nga një muaj paraburgim Naim Murselit, Granit Plavës dhe Kushtrim Kokallës për vrasjen e Liridona Ademajt.
Arseyt pse Naim Murseli organizoi vrasjen e bashkëshortes së tij, duke e inskenuar si grabitje, mbeten ende mister, teksa Prokuroria po vijon hetimet.
