Trajneri i Kombëtares shqiptare, Sylvinho, është i vetmi që nuk është nga Evropa në finalet e kampionatit që do të zhvillohen verën e ardhshme në Gjermani.
Të gjithë të tjerët janë nga “kontinenti i vjetër”, dhe një shtet dallon nga të tjerët.
Ky shtet është Italia, që ka katër njerëz të stolit ndër 21 skuadrat e kualifikuara deri tani, ndërsa tre të tjera do të përcaktohen nga “play off”-i i marsit të 2024-ës.
Ndër ta është padyshim Luçiano Spaleti i Italisë, por po ashtu Vincenzo Montella i Turqisë, Marco Rossi i Hungarisë dhe trajneri i Sllovakisë, Francesco Calzona.
Evropiani do të ketë dy trajnerë nga Gjermania, Julian Nagelsmann e kombëtares vendase, si dhe Ralf Rangnick i Austrisë, ndërsa një tjetër është me nënshtetësi të dyfishtë, gjermane dhe italiane, e ky është Domeniko Tedesco i Belgjikës.
Dy trajnerë ka edhe Spanja, teknikun e “Furisë së Kuqe”, Luis de La Fuente dhe atë të Portugalisë, Roberto Martinez.
Të gjitha vendet e tjera përfaqësohen nga një trajner vendas, siç është rasti i Anglisë me Garet Sauthgate apo i Francës, nënkampione e botës me Didier Deschamps.
Duke u kthyer tek Svlvinho, braziliani arriti një kualifikim të merituar në finalet e Evropianit me 4 fitore, 3 barazime e vetëm 1 humbje në një grup të vështirë me Çekinë e Poloninë.
