Një ngjarje e rëndë në Kosovë ka tronditur mbarë opinionin publik, ku Liridona Murseli (Ademaj) u vra nga bashkëshorti i saj, Naim Murseli, duke paguar persona të tjerë.
Naim Murseli pranoi orët e vona të së premtes se e kishte porositur ai ekzekutimin e së shoqes. Për këtë do të paguante 30 mijë euro Granit Plavën. Ky i fundit ishte ekzekutori. 15 mijë Euro ia dha para krimit, e 15 mijë të tjera do t’ia jepte pasi ishte kryer puna.
Pasi e shoqja vdiq në rrugët e Prishtinës, Murseli tha se kishin rënë pre e një grabitje dhe se ai vetë me dy fëmijët kishte shpëtuar, por Liridona, vetëm 30 vjeçe, u vra nga hajduti. Një histori e denjë për filma kur i shtohet edhe fakti se ai ishte prezent në ceremoninë mortore ku është filmuar duke përcjellë njerëzit me dorë në zemër.
Mbi varrin e saj, Naim Murseli la edhe një kurorë me lule, ku mbi të shkruhej “Të kujtojnë me mallë burri Naimi, si dhe djemtë”.
Ngjarja në fjalë ndodhi mbrëmjen e 29 Nëntorit në Prishtinë.
