Eno Nikulaj është varë me armë zjarri në Lezhë mbrëmjen e sotme, në një atentat që dyshohet të jetë i mirëmenduar.
Sipas burimeve policore, 40-vjeçari Eno Nikulaj ishte duke lëvizur me një automjet tip “Benz ML” me ngjyrë të bardhë, kur ndaj tij është qëlluar me breshëri.
Ai mbeti i plagosur rëndë dhe u dërgua në spital, por nuk mundi të mbijetojë.
Autorët ndërkohë dyshohet se janë larguar me një mjet tip “BMW” ngjyrë gri, me targa të vjedhura disa ditë më parë në kryeqytet. Targat rezulton se janë denoncuar në policinë e Tiranës më 29 nëntor, në zonën e Kombinatit.
“Rreth orës 21:30, në aksin rrugor ‘Lezhë-Shkodër’, në vendin e quajtur ‘Ura e trenit’, në rrethana ende të paqarta, është qëlluar me armë zjarri në drejtim të automjetit që drejtohej nga shtetasi E.N., 40 vjeç, banues në Shëngjin. Si pasojë është plagosur shtetasi E.N., i cili është transportuar në gjendje shumë të rëndë, në spitalin e Lezhës, për ndihmë mjekësore. Për këtë ngjarje është ngritur menjëherë një grup i posaçëm hetimor, si dhe janë ngritur pika kontrolli në të gjitha akset rrugore. Ndërkohë, vijon intensivisht kontrolli i zonës”, njoftoi fillimisht policia.
Më vonë, konfirmoi se 40-vjeçari humbi jetën në spital: “Ky shtetas, si pasojë e plagëve të marra, pavarësisht ndihmës dhe trajtimit të menjëhershëm mjekësor, ka ndërruar jetë në Spitalin Rajonal të Lezhës”.
Një automjet i djegur është gjetur nga blutë pranë Rinasit pas krimit, ndërsa po verifikohet nëse është mjeti që kanë përdorur autorët.
Eno Nikulaj është djali i xhaxhait të Ardjan Nikulajt. Ky i fundit u ekzekutua në Prill, në lokalin e hotelit të tij në Shëngjin. Sipas hetimeve, ai u qëllua me armë zjarri pë r vdekje nga një “killer” portugez i cili bashkëpunoi me disa shtetas anglez. Porosia, sipas prokurorisë, ishte dhënë nga Edmond Haxhia, nipit i Lekstakajve, me të cilët fisi Nikulaj ishte në hasmëri. Lidhur me krimin, portugezi është arrestuar në Marok për llogari të autoriteteve shqiptare, ndërsa personat e tjerë që akuzohen se kanë marrë pjesë në krim janë ndaluar në Britani: Edmond Haxhia, Stephen Hunt, Thomas Mithan, Harriet Bridgeman dhe Harry Simson.
Pak ditë më parë, u raportua se në kuadër të hetimeve, autoritetet marokene kanë sjellë në Shqipëri telefonin e Ruben Saraivës, 28-vjeçarit portugez i dyshuar se kishte rolin e ekzekutorit në vrasjen e biznesmenit Ardian Nikulajt.
