Stiljan Pasho, shefi i Sektorit të Shërbimeve të Kufirit në Drejtorinë Vendore të Kufirit dhe Migracionit Korçë është arrestuar pasi akuzohet se favorizoi një person që trafikonte drogë.
Prangosja u konfirmua këtë të enjte nga Agjencia e Mbikëqyrjes Policore që bën me dije se lidhur me rastin ka hetuar në bashkëpunim me prokurorinë e Korçës.
“Agjencia e Mbikëqyrjes Policore (Rajoni Korçë-Elbasan) ka ekzekutuar urdhërin e Prokurorisë Pranë Gjykatës Së Shkallës së Parë të Juridiksionit të Përgjithshëm Korçë për ndalimin e punonjësit të Policisë Kryekomisar S.P., 53 vjeç, me detyrë Shef i Sektorit të Kufirit pranë DVKM Korçë. Ndalimi u krye në kuadër të hetimeve të procedimit penal të vitit 2023, referuar nga Sektori i AMP Korçë, regjistruar për veprën penale ‘Trafikim i narkotikëve'”, njoftoi APM.
Nga veprimet hetimore, shtuan të njëjtat burime, dyshohet se Kryekomisari Pasho, me veprime konkrete e të drejtpërdrejta, duke shfrytëzuar pozicionin në DVKM Korçë, në intervale të ndryshme kohore dhe së fundmi në datë 27.11.2023 ka favorizuar shtetasin L.L (Lorenco Lika) të kalojë kufirin në PKK Kapshticë pa iu nënshtruar kontrollit kufitar në automjet, si dhe duke urdhëruar vartësit për mos kryerjen e kontrollit në mjetin e tij.
Por, pas kalimit të doganës shqiptare, mjeti në fjalë u ndalua nga pala greke, që gjeti dhe sekuestroi lëndën narkotike.
“Në lidhje me këtë procedim penal është bashkëpunuar edhe me homologët e Policisë greke nëpërmjet Pikës së Bashkëpunimit Policor Greqi – Shqipëri, e si rezultat i këtij bashkëpunimi është bërë e mundur kapja e 26 kg lëndë narkotike në shtetin grek“, njoftoi AMP.
Hetimet në kuadër të këtij procedimi vijojnë për identifikimin e personave të tjerë të mundshëm të përfshirë në aktivitet të paligjshëm dhe vënien e tyre para përgjegjësisë penale, mbyllet njoftimi.
