Ai nuk është më i vetmi, që e ka udhëhequr kombëtaren shqiptare të futbollit drejt finaleve të një kompeticioni madhor si Kampionati Europian. Megjithatë, do të mbetet në historinë kuqezi si i pari që arriti ta “thyejë akullin” më 2016, ta bënte “sefte” në këtë drejtim, duke i dërguar kuqezinjtë në finalet e Europianit të Francës.
I përsëritur në sukses nga braziliani Sylvinho tashmë, me kualifikimin e “Euro 2024” në xhep, italiani nuk ndihet xheloz, por mendon se grupi i lojtarëve në dispozicion të Sylvinho është më cilësor, luajnë në klubet më të mira të Europës.
Gianni de Biasi foli për “Euronews Albania”, duke cekur disa çështje. Natyrisht, nuk mund t’i shmangej asaj për të cilën akuzohet më shumë, që e la jashtë listës së kombëtares së “Euro 2016” mbrojtësin Berat Gjimshiti, tashmë kapiten i kuqezinjve:
“Nga 2016 deri më sot kanë kaluar 7 vite, secili lojtar ka marrë shumë eksperiencë. Isha unë që e sinjalizova të shkonte tek Atalanta. Më vjen keq që e lashë jashtë finaleve të Europianit më 2016, por nuk kishte luajtur shumë.
Miku im, që ishte drejtor i Atalantës, më tha nëse nuk luan rregullisht, si do ta merrni. Pati debat mbi përzgjedhjet e mia në Europian. U përpoqa të merrja ata që ishin më mirë dhe kishin luajtur më shumë në ndeshjet më përpara.
Duhet të kemi parasysh se Gjimshiti sot është 29 vjeç, atëherë ishte vetëm 22. Asokohe ishte djalë i ri, sot me eksperiencë. Në Itali kishte shkuar si fillestar, sot është lojtar i afirmuar, që ka treguar cilësitë e tij. Ta krahasosh me 7 vite më parë është diçka komplet tjetër”.
De Biasi po përlfitet për të marrë drejtimin e kombëtares së Kosovës, figuron mes kandidatëve potencialë, por pohon se nuk ka asnjë konakt për momentin.
Njëherazi, shprehet i disponueshëm për ta marrë përsipër këtë detyrë: “Duke qenë se Presidenti i Federatës së Kosovës e di numrin tim të telefonit, sepse në të kaluarën kemi kontaktuar shpesh, mund të bisedojmë.
Do të isha i nderuar të bëja të njëjtat gjëra si me Shqipërinë. Kosova ka shumë cilësi dhe besoj janë kushtet për të punuar mirë. Gjithçka varet dhe nga fakti i përbërjes së grupit. Duhet ngritja e një grupi kompakt, për mendimin tim arritja e objektivave është e mundur. A jam kontaktuar nga drejtuesit e FFK? Deri tani jo”.
Si italian që është, natyrisht nuk e hedh poshtë punën e Edy Reja në stolin e kombëtares kuqezi, kur i kërkohet të krahasojë atë që bëri më pas Sylvinho, e cila kulmoi me kualifikimin në finalet e “Euro 2024”: “Çfarë bëri Sylvinho, që nuk u pa te Reja? Është e vështirë për t’u vlerësuar.
Nuk e kam parë si kanë punuar Sylvinho apo Reja, nuk kam qenë i pranishëm. Është e vështirë të them pse Reja nuk ia doli dhe Sylvinho po. Shqipëria mund të ketë shanse për ta kaluar grupin në finalet e Europianit të Gjermanisë, shpresoj që më 2 dhjetor të ketë short pozitiv. Shqipëria ka luajtur në grupe të vështira me Serbinë, Italinë dhe Spanjën. Ia uroj me gjithë zemër ta kalojë fazën e grupeve.
Në teori, Shqipëria mund të përballet me Italinë dhe kjo do të ishte sfidë e vështirë. Nëse ka fatin e keq të përballet me skuadra si Franca apo Anglia, do ta ketë edhe më të vështirë. Megjithatë, gjithçka që do të bëjë në Europianin e vitit të ardhshëm do të jetë sukses. Shqipëria ka lojtarët kryesorë, ka grup djemsh që merren vesh mirë. Keni Armand Dukën, që është zëvendëspresident i UEFA-s”.
