Garda Civile e Spanjës ka vënë në pranga 8 persona, 7 prej tyre spanjollë dhe një shqiptar, gjatë shkarkimit të një ngarkese prej 600 kilogramësh kokainë që mbërriti në Valencia e fshehur në fundin e dyfishtë të një kontejneri. Arrestimet ndodhën kur trafikantët e dyshuar të drogës po përpiqeshin të merrnin pakot me kokainë për t’i hipur në një furgon.
Të arrestuarit u dërguan në burg pasditen e djeshme (e enjte) me urdhër të gjyqtarit hetues numër 13 të Valencias, i cili mori vendimin pasi shqyrtoi raportin e policisë, dëgjoi të hetuarit, nga të cilët vetëm tre kanë pranuar të dëshmojnë në gjykatë.
Sipas informacioneve, kjo ngarkesë u nis nga porti i Callao, në Peru, e ngarkuar me avokado dhe mbërriti në Valencia dy javë më parë. Që nga ai moment, agjentët e Ekipit të Krimit të Organizuar dhe Kundër Drogës (EDOA) të Komandës së Valencias inspektuan dërgesën dhe i nënshtruan një mbikëqyrje të ngushtë, pasi gjykata e Valencias urdhëroi kontrollin e ngarkesës, për të rikuperuar drogën në kohën e duhur. Kështu, ngarkesa e avokadove u dërgua dhe u ndoq në destinacionin e saj, një magazinë në një zonë industriale në Malaga, ku shkarkoheshin frutat. Pas kësaj, i njëjti kamion u kthye në Valencia me kontejnerin, tashmë bosh, dhe e depozitoi atë në një terminal kontejnerësh në Quart de Poblet.
Shqiptari vepronte si ‘noter’ i dërgesës për organizatën importuese të drogës, pra grupi kriminal që paguante dërgesën te prodhuesit kolumbianë dhe më pas kujdeset për shpërndarjen e saj.
