Burreli është mposhtur në shtëpi me përmbysje nga Bylisi. Sfida e zhvilluar në stadiumin “Liri Ballabani” përfundoi me rezultatin 1-2 në favor të ballshiotëve.
Pas kësaj sfide, për mikrofonat e MCN TV, foli trajneri i Burrelit, Klevis Hima.
“Normalisht që jam i mërzitur. Besoj se do ishte më mirë ta nisja me një rezultat pozitiv, por futbolli kështu është. Shënon i pari dhe ndodhi ajo që ndodhi, por kemi kohë dhe besoj se do të bëjmë punë më shumë dhe rezultate më të mira. Për këtë jam i bindur. Për këtë arsye vendosa që të drejtoja Burrelin”, u shpreh Hima.
-Ke marrë përgjigje nga ekipi me lojën e sotme?
“Unë e kam ndjekur Burrelin, sepse ishte besimi tek këto lojtarë. Pranova ofertën e Burrelit dhe terreni nuk ishte aq i mirë si për Bylisin ashtu dhe për ne. Unë tentova, sidomos në fundin e pjesës së dytë duke luajtur ofensiv për të shënuar, por nuk ia arritëm. Sa i përket gabimit të portierit, të gjithë portierët kanë bërë gabime. Nuk mund ta quaj si të tillë, pasi siç bëri atë gabim shpëtoi dhe një rast mjaft të vështirë. Është një portier me të ardhme.”
-Kalon në avantazh i pari, por nuk ia dilni ta mbani. Ndjeni keqardhje që nuk administruat rezultatin?
“Këto 4 ditë që kam punuar në Burrel ishim përgatitur për goditje standarde. Hymë në presion duke ditur që ekipi ishte paksa i ngarkuar psikologjikisht. Keqardhje sigurisht që ndjej.”
