Ministri i Shtetit grek, Stavros Papastavrou ndodhet në Shqipëri, ku sipas protothema.gr do të takohet me kryebashkiakun e zgjedhur të Himarës, Fredi Belerin, i cili ndodhet në burg.
Takimi raportohet se do të zhvillohet në mesditë në burgun e Durrësit, ku ndodhet i Beleri prej gjashtë muajsh. Takimi vjen një ditë para seancës në GJKKO për Belerin.
Ky i fundit akuzohet nga SPAK për blerje votash për zgjedhjet e 14 majit në Himarë. Ndërkohë vetë Beleri dhe opozita e quan politike arrestimin dhe akuzojnë si “rrëmbyes” kryeministrin Edi Rama. Prej javësh, Beleri po përballet me një ping-pong vendimesh të gjykatave, që deri më tani nuk i kanë aprovuar lejen e nevojshme për tu betuar si kryebashkiak.
Çështja ka sjellë edhe tensione me Greqinë, që kërkon betimin e Belerit. Shteti grek ka vendosur një veto duke penguar avancimin e integrimit të Shqipërisë në BE.
Kryeministri Edi Rama nga ana tjetër pretendon se rasti i Fredi Belerit, “është një çështje e drejtësisë” dhe qeveria s’mund të ndërhyjë kurrsesi.
